సీమాంధ్రపై వరాల జల్లు కురిపించిన సోనియా...

Sonia Gandhi

గుంటూరు : సీమాంధ్ర ప్రజలపై కాంగ్రెస్ అధ్యక్షురాలు సోనియాగాంధీ వరాల జల్లు కురిపించారు. గురువారం నగరంలోని పొన్నూరు రోడ్డు ఆంధ్రా ముస్లీం కళాశాల ప్రాంగణంలో సీమాంధ్ర కాంగ్రెస్ బహిరంగ సభ నిర్వహించింది. ఈ సభకు సోనియా హాజరయ్యారు. ఈ సందర్భంగా సీమాంధ్ర ప్రజల మీద వరాల జల్లు కురిపించారు. టిడిపి, బిజెపి, వైసిపి పార్టీలపై విమర్శలు చేశారు. సోదర..సోదరీమణులకు నమస్కారం అంటూ తెలుగులో సోనియా ప్రసంగించారు. ఆమె ఏమన్నారో..ఆమె మాటల్లోనే..
చాలా ఆలోచించాం..
 సుదీర్ఘకాలంగా ఉన్న సమస్యను పరిష్కరించే ఉద్ధేశ్యంతో చాలా ఆలోచించిన తరువాతే తెలంగాణపై నిర్ణయం తీసుకున్నాం. తెలంగాణ రాష్ట్రం ఏర్పాటు చేయాలని అన్ని పార్టీల లేఖలు ఇచ్చాయి.
విద్యార్థులు ఆందోళన చెందవద్దు..
విభజన చేయడం వల్ల హైదరాబాద్ విద్యా సంస్థల్లో అవకాశాలు పోతాయని ఆందోళన చెందవద్దు. పదేళ్ల పాటు విద్యావకాశాల్లో యథాతథ స్థితి కొనసాగుతుంది. ఈలోపల పలు ఉన్నత విద్యా సంస్థలు నెలకొల్పుతాం.
2009 హామీలను నెరవేర్చాం...
 గుంటూరు తెలుగు సంస్కృతిని ప్రతిబింబించే నగరం. హైదరాబాద్ లో ఉంటున్న సీమాంధ్రుల యోగక్షేమాలు తెలుసుకునేందుకు గవర్నర్ కు ప్రత్యేక అధికారాలు ఇచ్చాం. 2009లో ఇచ్చిన హామీలను నెరవేర్చాం.
బీజేపీ - టీడీపీ తోడు దొంగలు..
 ఒక నాణానికి బొమ్మ, బొరుసు ఎలానో టీడీపీ - బీజేపీ అలాగ. వీరిద్దరూ తోడు దొంగలు. 2002లో గుజరాత్ లో జరిగిన అల్లర్లలో ఎన్డీయే మిత్రులు బయటకు వెళ్లారు. తాజాగా టీడీపీ, బీజేపీతో కలిసింది. మతతత్వ శక్తులను ప్రోత్సాహించినట్లే. కాంగ్రెస్ అందర్నీ గౌరవిస్తుంది. అందులో భాగంగా ఇందిరా, రాజీవ్ గాంధీలు బలయ్యారు.
వైఎస్ పేరు పెట్టుకుని దుష్రచారాం..
 వైఎస్ కాంగ్రెస్ వ్యక్తిగా పనిచేశారు. కాంగ్రెస్ కూడా ఆయనకు పదవువలనిచ్చి పోత్సాహించింది. కానీ ఆయన పేరు పెట్టుకుని దుష్ర్పచారం చేస్తున్నారు. కాంగ్రెస్ లో ఉంటేనే అందరికీ గుర్తింపు. కాంగ్రెస్ పార్టీ సామాజిక న్యాయానికి ప్రతీక.
చిరంజీవి, రఘువీరా భేష్...
 సీమాంధ్ర మేనిఫెస్టోను చిరంజీవి, రఘువీరారెడ్డిలు బాగా రూపొందించారు. మేనిఫెస్టోలో రూపొందించిన వాటిని పక్కాగా అమలు చేస్తాం. ఇది నా ప్రామిస్.
ఓటు వేసే ముందు ఒక్కసారి ఆలోచించండి..
 ఓటు వేసే ముందు ఒక్కసారి ఆలోచించండి. మతతత్వ పార్టీ కావాలో..లౌకికమైన ప్రభుత్వం కావాలో...ఢిల్లీలో లౌకిక ప్రభుత్వం, సీమాంధ్ర అభివృద్ధిని చేసే కాంగ్రెస్ పార్టీకి ఓటు వేయండి..జై హింద్..జై కాంగ్రెస్..జై సీమాంధ్ర''
ఈ బహిరంగ సభలో దిగ్విజయ్ సింగ్, చిరంజీవి, రఘువీరారెడ్డి, జేడీ శీలం తదితరులు పాల్గొన్నారు.
సోనియా హామీలు...

• కడపలో స్టీల్ ప్లాంట్ నిర్మాణం చేపడుతాం.
• విశాఖ, విజయవాడ, తిరుపతి నగరాల్లో ఎయిర్ పోర్టులు ఏర్పాటు చేస్తాం.
• నెల్లూరులో దుగరాజపట్నం పోర్టు.
• సీమాంధ్ర ప్రాంతానికి న్యూ రైల్వే జోన్ ఏర్పాటు.
• రెండు సెంట్రల్ యూనివర్సిటీ ఏర్పాటు. (కేంద్ర విశ్వవిద్యాలయం. పెట్రోలియం యూనివర్సిటీ)
• సీమాంధ్రకు స్పెషల్ ఆర్థిక నిధులు.
• రైతుల రుణాలు మాఫి చేస్తాం.
• ఆరోగ్య హక్కును చట్టబద్ధత చేస్తాం.
• పక్కా ఇళ్లు, వృద్ధులు, వింతంతువులకు ఉన్న పెన్షన్ లను చట్టబద్ధత కలిగించేలా చేస్తాం

పవన్...ఆరంభం నాటి ఆవేశమేదీ?

Pawan Kalyan

హైదరాబాద్ : ఏవి నిరుడు వీచిన ఆగ్రహ పవనాలు? ఏవి తమ్ముడూ ప్రజాకాంక్షలను నెరవేరుస్తానంటూ ఎత్తిన జన సేన జెండా రెపరెపలు? జనసేన పార్టీ నేత పవన్‌ కల్యాణ్‌ తూటాల్లాంటి మాటలు... బట్టీ పట్టిన డైలాగ్‌లేనా? సీమాంధ్రలో ఎన్నికల అనంతరం జనసేన డిజాల్వ్ అయిపోతుందా? అన్న చిరంజీవి అడుగుజాడలను అనుసరిస్తానన్న పవన్‌... పార్టీ విషయంలోనూ అన్ననే ఆదర్శంగా తీసుకుంటారా?
    రాజకీయాలు పూర్తిగా భ్రష్టుపట్టిపోయాయనీ, ఆ రాజకీయాలను మార్చడానికే తాను జనసేన పార్టీని స్థాపించానంటూ చెప్పిన తమ్ముడు పవన్‌ కళ్యాణ్‌కు హఠాత్తుగా జ్ఞానోదయమైపోయింది. జనసేన వద్దూ, గినసేన వద్దు. సీమాంధ్రలో టీడీపీకి, దేశంలో మోడీకి పగ్గాలు అప్పగిస్తే చాలు.. సబ్‌ ఖుష్‌. అన్నీ సమస్యలనూ వాళ్లిద్దరే తీర్చేస్తారని పవన్ అనుకుంటున్నారా ? అందువల్ల ఇక జనసేనను కొనసాగించాల్సిన అవసరం ఎంత మాత్రం లేదు. ఇదీ ఇండైరెక్ట్ గా పవన్‌ సూచన. చూడబోతే ఎన్నికల ఫలితాల అనంతరం జనసేనను టీడీపీలోనో, బీజేపీలోనే కలిపేసి... బదులుగా ఓ మంత్రి పదవిని పుచ్చేసుకుని తమ్ముడు కూడా అన్నదారినే అనుసరించే అవకాశాలు పుష్కలంగా కనిపిస్తున్నాయి.
 అన్న చిరంజీవికి జ్ఞానోదయం కావడానికి ఒకసారి ఎన్నికలు జరగాల్సి వస్తే... తమ్ముడికి మాత్రం ఎన్నికల ముందే జ్ఞానోదయం అయిపోయినట్లు కనిపిస్తోంది. తిరుపతి సభలో పవన్‌ మాటల తీరును చూస్తే అర్థమౌతుంది.
పవన్ పార్టీ పెటాల్సినవసరం ఏముంది ?
   మరి చంద్రబాబు అంత సమర్థుడిగా కనిపిస్తే.. పవన్‌ పార్టీ పెట్టాల్సిన అవసరం ఏమిటి? జనసేన పార్టీ పెట్టే ముందు పవన్‌ కళ్యాణ్‌ కళ్లకు చంద్రబాబు సమర్థత కనిపించలేదా? ఆ మాత్రం దానికి పార్టీ పెట్టి అభిమానులు, రాష్ట్ర ప్రజల్లో ఆశలు రేకెత్తించాల్సిన అవసరమేముంది? తిరుపతి సభలో పవన్‌ కళ్యాణ్‌ ఎంత సేపూ చంద్రబాబు, మోడీల భజన చేయడం చూసిన పవన్‌ అభిమానులకు మతిపోయినంత పనైంది.
అభిమానుల ఆగ్రహం..
పార్టీ పెట్టడానికి బదులు సమర్థులైన చంద్రబాబు సమక్షంలోనో, మోడీ సమక్షంలోనో టీడీపీదో, బీజేపీదో తీర్థం పుచ్చుకొని ఉంటే సరిపోయేదిగా అని అభిమానులు ఆగ్రహం వ్యక్తం చేస్తున్నారు.

అసోంలో తీవ్రవాదుల కాల్పులు - ఏడుగురు మృతి

అసోం: అసోంలోని కోక్రాఝర్ జిల్లాలో శుక్రవారం తెల్లవారుజామున తీవ్రవాదులు జరిపిన కాల్పుల్లో నలుగురు మహిళలతో సహా ఏడుగురు మృతిచెందారు. మరికొందరు తీవ్రంగా గాపయడ్డారు. నేషనల్ డెమాక్రటిక్ ఫ్రంట్ ఆఫ్ బోడోలాండ్ తీవ్రవాదులు ఈ కాల్పులుకు పాల్పడ్డట్లు తెలుస్తోంది. కాల్పుల ఘటన నేపథ్యంలో పరిస్ధితిని సమీక్షించేందుకు రాష్ట్ర ప్రభుత్వం పది కంపెనీల పారామిలటరీ దళాలను కోక్రాఝర్ కు పంపించింది.

ప్రత్యామ్నాయం కోసం ఎదురుచూపు- సీతారాం ఏచూరి

విశాఖపట్నం: కాంగ్రెస్, బిజెపి రాజకీయ, ఆర్ధిక విధానాలలో తేడాలేదని, ప్రజలు ప్రత్యామ్నాయం కోసం ఎదురు చూస్తున్నారని సీపీఎం పొలిట్ బ్యూరో సభ్యులు సీతారాం ఏచూరి అన్నారు. విశాఖపట్నంలో శుక్రవారం ఆయన మీడియాతో మాట్లాడారు. ప్రత్యామ్నాయ ఆర్ధిక విధానాలతో ఉద్యోగావకాశాలు పెరుగుతాయని, ఆర్ధిక వృద్ధి చేకూరుతుందని చెప్పారు. అటువంటి ప్రత్యామ్నాయ విధానాల కోసం సీపీఎం కృషిచేస్తుందని తెలిపారు. మనదేశాన్ని మతోన్మాద రాజకీయాల నుంచి కాపడడం తమ పార్టీలక్ష్యమని చెప్పారు. గుజరాత్ మోడల్ అభివృద్ధితో దేశం అధోగతి పాలవుతుందని అన్నారు. గాజువాఖలో సీపీఎం అభ్యర్ధి సి.హెచ్.నర్సింగరావును గెలిపించాలని కోరారు.

శేఖర్ కమ్ముల..'అనామిక': రివ్యూ

'ఆనంద్', 'హ్యాపీడేస్', 'లీడర్' వంటి చిత్రాలతో సూపర్ హిట్స్ అందుకున్నాడు దర్శకుడు శేఖర్ కమ్ముల. ఈ సినిమాలతో క్లాస్, యూత్ ఆడియెన్స్ కు బాగా దగ్గరయ్యాడు. శేఖర్ కమ్ముల అంటే ఒక జోన్ సినిమాలకే పరిమితం అనే కామెంట్ ఉంది. కానీ తొలిసారి 'అనామిక' తో ప్రయోగం చేశాడు. బాలీవుడ్ హిట్ మూవీ 'కహానీ'ని తెలుగులో రీమేక్ చేశాడు. సస్పెన్స్ థ్రిల్లర్ అయిన ఈ చిత్రాన్ని తెలుగులో 'అనామిక' పేరుతో తెరకెక్కించాడు. అయితే 'కహానీ'కి అచ్చు రీమేక్ లా కాకుండా కేవలం మూల కథను తీసుకొని దాదాపు 70శాతం మార్పులు చేసి రూపొందించిన 'అనామిక' ఈ గురువారం 'మేడే' సందర్భంగా మన ముందుకు వచ్చింది. అయితే ఈ బుధవారం రాత్రే ఓ ప్రముఖ టీవీ ఛానల్లో ఫస్ట్ రీల్ విడుదల చేసి సినిమాపై క్యూరియాసిటీ పెంచాడు శేఖర్. ఇప్పటికే వరుస హిట్లతో దూసుకుపోతున్న నయనతార ప్రధాన పాత్రలో నటించిన 'అనామిక' ప్రేక్షకులను ఆకట్టుకుందా.. ? శేఖర్ ప్రయోగం ఫలించిందా.. ? అనేది చూద్దాం..
కథ విషయానికి వస్తే..
   అనామిక (నయనతార) పది రోజులుగా కనిపించని తన భర్తని వెతుక్కుంటూ ఇండియాకి వస్తుంది. పాతబస్తీలో అతను బస చేసిన హోటల్‌లోనే దిగుతుంది. ఈ కేసు ఇన్వెస్టిగేషన్ చేసేందుకు ఎస్ఐ పార్థసారధి (వైభవ్) అనామికకు హెల్ప్ చేస్తుంటాడు. భర్త ఆచూకీ తెలుసుకునే ప్రయత్నంలో ఆమె చాలా ఇబ్బందులు పడుతుంది. అనామికతో కలిసి సారథి చేసే విచారణలో పలు ఆసక్తికరమైన విషయాలు తెలుస్తాయి. అయితే ఢిల్లీ నుంచి వచ్చిన క్రైమ్ బ్రాంచ్ ఆఫీసర్ ఖాన్ ( పశుపతి ) మాత్రం అతను అనామిక భర్త కాదని తీవ్రవాది 'మిలింద్ దామ్జీ' అని వాదిస్తుంటాడు. ఇంతకూ అజయ్ శాస్త్రి దొరికాడా..? ఈ మిలింద్ దామ్జీ ఎవరు..? మిలింద్ దామ్జీకి అజయ్ కు సంబంధమేంటి..? అనేది మిగిలిన కథ.
విశ్లేషణ:..
    బాలీవుడ్ లో విద్యాబాలన్ నటించిన 'కహానీ' నుంచి కేవలం మూల కథనే తీసుకున్న దర్శకుడు శేఖర్ కమ్ముల, యండమూరితో కలిసి 'అనామిక'ను సృష్టించాడు. 'కహానీ'కి రీమేక్ కాదు అనడంలో సందేహం లేదు. ఎందుకంటే విద్యాబాలన్ ప్రెగ్నెంట్ గా రావడం.. క్లైమాక్స్ లో ప్రెగ్నెంట్ కాదని రివీల్ అవ్వడమే కహానీ లో పెద్ద థ్రిల్. కానీ అటువంటి థ్రిల్ ని కాదని కొత్త కథను రాసుకోవడం కాస్త రిస్క్ అయినా శేఖర్ కొత్త దారిలో నడిచేందుకే ప్రయత్నించాడు. అందుకు ప్రతిఫలంగా 'అనామిక' రూపం మారింది. అయితే 'కహానీ' తో పోల్చితే.. అంతగా ఆకట్టుకోలేకపోయింది. సినిమా మొదలైన పదినిముషాలు ఆసక్తిగా సాగినా .. ఆ తర్వాత స్లోగా మారింది. కథలోకి తీసుకెళ్లడానికి చాలా టైమ్ పట్టింది. దీంతో ఫస్టాఫ్ లో ఆసక్తి తగ్గింది. సస్పెన్స్ థ్రిల్లర్ గా చెప్పుకునే ఈ మూవీలో థ్రిల్లింగ్ లేకపోవడమే ఆడియెన్స్ కు కాస్త బోర్ కొట్టించింది. ఇక సెకాండాఫ్ మాత్రం చాలా వేగంగా సాగుతుంది. ఇన్వెస్టిగేషన్ చేసే సన్నివేశాలు మూవీపై ఆసక్తిని పెంచాయి. అయితే ఈ చిత్రంలో చాలా లాజిక్ లు వదిలేశాడు శేఖర్. దర్శకునిగా అతని వైఫల్యం ఇది. 'అనామిక' భర్త ఉగ్రవాదని తనకు ఎప్పుడు తెలిసింది..? ఎలా తెలిసింది..? అనే చాలా ప్రశ్నలకు సమాధానం లేదు. అంతేకాదు.. 'అనామిక'తన భర్త విషయంలో.. సమాజం పట్ల ప్రేమా లేక తను మోసపోయాననే పగా.. ? అనామిక ఎందుకు ఇలా చేసిందనే దానిపై క్లారిటీ లేదు.
సినిమాకి నయనతారే పెద్ద అసెట్. గ్లామర్ గా కనిపిస్తూనే అవసరమైన చోట పవర్ పుల్ గా మారింది. తను ఏడుస్తూ.. ఆడియెన్స్ ను కూడా కాస్త ఏడిపిస్తూ.. పాత బస్తీలో తిరిగింది. ఇక మ్యూజిక్ విషయంలో కీరవాణి సక్సెస్ అయ్యాడనే చెప్పవచ్చు. రెండు పాటలే ఉన్నా.. ఎక్కువగా బ్యాక్ గ్రౌండ్ స్కోర్ తో ఆకట్టుకున్నాడు. సాధారణంగా కనిపించే సన్నివేశాలకు కీరవాణి బ్యాక్ గ్రౌండ్ స్కోర్ ప్రాణం పోసింది. తెర మీద హీరో నయనతార అయితే తెర వెనుక హీరో కీరవాణి అయ్యాడు. సస్పెన్స్ థ్రిల్లర్ అయిన 'అనామిక'లో ఫొటోగ్రఫీకి, కామెడీకి ఛాన్స్ లేదు. వైభవ్ పాత్ర తేలిపోయింది. పోలీస్ ఆఫీసర్ గా చాలా పేలవంగా కనిపించాడు. పశుపతి, హర్షవర్ధన్ రాణే ల నటన ఫర్వాలేదనిపించారు. క్లైమాక్స్ లో శేఖర్ ఇచ్చిన ట్విస్ట్ బాగుంది.
ప్లస్ పాయింట్స్: నయనతార, కీరవాణి మ్యూజిక్, సెకండ్ ఆఫ్.
మైనస్ పాయింట్స్: దర్శకత్వం, కథనం.

'రోజా', 'మనోహరం' లాంటి సినిమాలు గుర్తుకు వస్తున్నా 'అనామిక' క్లైమాక్స్ ట్విస్ట్.. 'కహానీ' చూడనివారికి నచ్చే అవకాశం ఉంది. ఇక ఈమూవీకి '10టివి' ఇచ్చే రేటింగ్-2/5.

'ఎముకలు కుళ్ళిన వయస్సు మళ్ళిన' సినిమాల్లో మేడే జాడేది..?!

     ''ఎముకలు కుళ్ళిన…వయస్సు మళ్ళిన సోమరులారా! చావండి!నెత్తురు మండే…శక్తులు నిండే సైనికులారా! రారండి..! హరోం! హరోం హర..హర! అని కదలండి! మరో ప్రపంచం…మహా ప్రపంచం'' అంటూ శ్రీశ్రీ భావోద్వేగంతో రాసుకున్న కవితలన్నీ ప్రపంచ కార్మికుల గుండెల్లో ఇప్పటికీ.. ఎప్పటికీ ప్రజ్వలిస్తూనే…ఉంటాయి.
'మేడే' నేపథ్యం...
    1886 చికాగోలో పనివాళ్ళకి 8 గంటల మాత్రమే పనిగంటలుండాలని చేసిన సమ్మెలో జరిగిన మారణహోమానికి గుర్తుగా జరుపుకునేదే 'మేడే'. ప్రతి సంవత్సరం మే 1న జరుపుకునే మేడే రోజు కార్మికులకు సెలవు దినంగా ప్రకటించటం జరిగింది. 1889లో ఫ్రెంచ్ రివల్యూషన్ శతాబ్దిని చేసుకుంటున్న సందర్భంలో 1890 నుండి చికాగో ఘటనకు గుర్తుగా 'మేడే' ని జరుపుకోవాలనే ప్రతిపాదన వచ్చింది. 1991 నుంచి మేడే ను ప్రతి సంవత్సరం జరపుకునే వేడుకగా అంతర్జాతీయ ద్వితీయ కాంగ్రెస్ లో నిర్ణయం జరిగింది. ఆ తర్వాత 1894 లో మేడే విప్లవం జరిగింది. 1904 లో మే 1 వ తేదీని ఎనిమిది గంటల పనివేళలుగా పనిదినాలను నిర్ణయించటానికి, ప్రపంచ శాంతికి మేడే గా జరుపుకోవాలని నిర్ణయించుకున్నారు.
   కారల్‌మార్క్స్, లెనిన్‌, స్టాలిన్‌ లు చూపిన మార్గ దర్శకత్వంలో ప్రపంచంలో ఉండే కార్మిక, కర్షక సోదరులంతా ఏకం అయ్యారు. వాళ్ల గుండెలోతుల్లో నుంచి పుట్టుకొచ్చిందే ప్రపంచ కార్మిక దినోత్సవం. మన తెలుగు సినిమాలు తొలితరం నుంచి కూడా జమిందారీ వ్యవస్థకు వ్యతిరేకంగా భూపోరాటాలపై, కార్మిక సంక్షేమంపై చాలా చిత్రాలే వచ్చాయి. ఒకప్పుటి నాగయ్య కాలం నుంచి నేటి ఆధునిక యుగంలో హీరోల దాకా కార్మికుల సమస్యలపై కేంద్రీకరించే కథలతో సినిమాలు ఎన్నో వచ్చాయి.
కార్మికుల సమస్యలపై వచ్చిన సినిమాలు..
   మహానటుడు ఎన్‌.టి.రామారావు.. 'రైతుబిడ్డ', 'రిక్షారాముడు', 'డ్రైవర్‌ రాముడు' లాంటి కార్మిక పాత్రలతో అభిమాన ప్రేక్షకులకు దగ్గర య్యారు. హీరో కృష్ణ కూడా ఎర్రజెండాలు పట్టుకుని కార్మిక పక్షపాతిగా 'జగన్నాధ రథచక్రాలు' సినిమాలో నటించారు. అలాగే 'ప్రజారాజ్యం' సినిమాలో ఆయన రైతుకూలీ సంఘం నాయకుడిగా నటించారు. మాదాల రంగారావు హీరోగా నటించిన చిత్రాలన్నీ దాదాపు కార్మిక సమస్యలను ప్రతిబింభించేవే కావడం విశేషం. 'ఎర్రమల్లెలు' చిత్రంలో కార్మికుల సమస్యలను చక్కగా విశ్లేషించారు. 'మేడే' అంటూ అందులోని పాట ఇప్పటికీ ప్రేక్షకుల గుండెల్లో చెక్కుచెదరలేదు. ఇక ప్రజానటుడు ఆర్‌. నారాయణమూర్తి కేవలం కార్మిక, కర్షక సమస్యల మీద అనేక చిత్రాలను తీసి విజయం సాధించారు. తెలుగు చిత్రసీమలో ఎర్రజెండా రెపరెపలాడేలా చేశారు. 'ఎర్రజెండెర్రజెండెన్నియల్లో…ఎర్రెర్రని జెండా ఎన్నియల్లో..' అంటూ నారాయణమూర్తి పాడిన పాటలు విప్లవభావాలు రేకెత్తేవిగా …ఉద్వేగపూరితంగా ఉంటాయి. రీసెంట్‌గా 'లక్ష్మీ' చిత్రంలో హీరో వెంకటేష్‌ మొదట్లో యజమానిగా తర్వాత పరిస్థితుల ప్రభావంతో అదే కంపెనీలో పనిచేసే సాధారణ కార్మికుడిగా పనిచేసి యజమానికి, కార్మికుడికి ఉన్న అనుబంధాన్ని చక్కని కోణంలో ఆవిష్కరించారు తన నటనతో. నటభూషణ శోభన్‌బాబు కూడా 'మనుషులు మారాలి' చిత్రంలో కార్మికుడిగా నటించారు. బాలకృష్ణ 'రాము' చిత్రంలో, చిరంజీవి 'ఘరానా మొగుడు', కృష్ణంరాజు 'సీతారాములు' అక్కినేని నాగేశ్వరరావు 'పవిత్రబంధం' చిత్రంలో కార్మికుడిగా నటించారు.
శ్రమ జీవుల కష్టాలను తెలిపే సినిమా పాటలు..
   పెట్టుబడి దారి వ్యవస్థ ఉన్నంత వరకు శ్రమజీవి దోపిడీకి గురి అవుతూనే ఉంటాడు. లాభాపేక్షతో మనిషిని పీల్చి పిప్పి చేస్తారు. దేశం మారింది, కాలం కూడా మారింది. వీటన్నింటితో పాటు శ్రమజీవి కష్టం కూడా మారితే ఆ రోజు నిజమైన పండగ రోజే అవుతుంది. 'మా భూమి'..గౌతమ్ ఘోష్ దర్శకత్వం వహించిన అపురూప చిత్రం. ఆ చిత్రంలోని 'పల్లెటూరి పిల్ల గాడా..' అనే పాట ఏళ్ళు గడిచినా మనల్ని వెంటాడుతూనే ఉంటుంది. పల్లెటూరి పిల్లవాడి కష్టాల ఆ పాట మన కళ్ళ ముందు ఇంకా సజీవంగా నిలిచి ఉంది. అణిచివేత నుంచే పోరాటం మొదలవుతుంది. అది పల్లె అయినా పట్నం అయినా.. దోపిడీ ఉన్నప్పుడు శ్రమకు సరైన గుర్తింపు లేనప్పుడు ఉద్యమం ఉప్పెనలా లేస్తుంది . ఈ పోరాటంలో యువతరం పాలు పంచుకుంటే నవయుగం అవతరించడం సాధ్యమౌతుంది. అనే చక్కని సందేశాన్ని అందించిన 'యువతరం శిర మెత్తితే..' అనే పాట 'నవయుగం' చిత్రంలో ఉంది. ప్రజలను చైతన్య పరిచే చిత్రాలు ఈ మధ్య బాగా తక్కువయ్యాయి. అందరు కామెడీ లో హీరో బాబుల భజనల్లో కొట్టుకుపోతున్నారు. ఒక్క నారాయణ మూర్తి మాత్రం ప్రజా సమస్యల మీదనే చిత్రాలు తీస్తున్నారు. ఆయన తీసే ప్రతీ చిత్రం లో ప్రజలను చైతన్య పరచే పాటలు కచ్చితంగా ఉంటాయి. శ్రమ ను గుర్తిస్తే .. శ్రమజీవి కష్టానికి తగిన ప్రతి ఫలం ఇస్తే.. దేశం ప్రగతి సాధిస్తుంది. మన సినిమాలు కూడా అలాంటి ప్రగతి కి మార్గదర్శకాలుగా నిలుస్తాయని ఆశిద్దాం..

జగన్ సీమాంధ్రలో పుట్టలేదా ? - పవన్ కల్యాణ్..

pawan kalyan

నెల్లూరు : నేతల మధ్య తిట్ల పురాణం తారాస్థాయికి చేరుకొంటోంది. తెలంగాణ ఎన్నికలు పూర్తవగానే వివిధ పార్టీల నేతలు సీమాంధ్రలో ప్రచారం చేపడుతున్నారు. ఎన్డీయే నిర్వహిస్తున్న సభలో పాల్గొంటున్న చంద్రబాబు, పవన్ లు ఎక్కువగా కేసీఆర్, జగన్ లను టార్గెట్ చేస్తూ ప్రసంగిస్తున్నారు. గురువారం నెల్లూరు జిల్లాలోని ఎసీ సుబ్బారెడ్డి స్టేడియంలో జరిగిన సభలో గుజరాత్ ముఖ్యమంత్రి నరేంద్ర మోడీ, టిడిపి అధ్యక్షుడు చంద్రబాబు నాయుడు, జనసేన పార్టీ అధ్యక్షుడు పవన్ కల్యాణ్ లు పాల్గొన్నారు. ఈ సభలో పవన్ ఆవేశంగా ప్రసంగిస్తూ ఓటర్లను ఆకట్టుకునే విధంగా ప్రయత్నించారు. సీమాంధ్ర ప్రాంతానికి ముఖ్యమంత్రి కావాలని కలలు కంటున్న జగన్ కు పౌరుషం లేదా అని ప్రశ్నించారు. సీమాంధ్ర ప్రాంతాన్ని తిడుతున్న జగన్ ఎందుకు స్పందించడం లేదని..సీమాంధ్రలో పుట్టలేదా అంటూ ఆవేశంగా ప్రసంగించారు. తెలుగు జాతిని విచ్చిన్నం చేస్తే బాధ కలిగిందని తెలిపారు. సీమాంధ్ర ప్రాంత ఆత్మ గౌరవాన్ని కాపాడలేని నువ్వు సీమాంధ్ర ప్రాంతానికి ముఖ్యమంత్రి కాలేవు అంటూ జగన్ ను ఉద్ధేశించి పవన్ వ్యాఖ్యలు చేశారు.

స్వాతి ఇంట్లో విషాదఛాయలు..

Swathi 

గుంటూరు : చెన్నై సెంట్రల్ రైల్వే స్టేషన్ లో ఆగి ఉన్న గౌహతి ఎక్స్ ప్రెస్ లో బాంబు పేలుళ్లలో మృతి చెందిన గుంటూరు వాసి స్వాతి (22) ఇంట్లో విషాద ఛాయలు అలుముకున్నాయి. స్వాతి చెన్నై టీసీఎస్ లో సాఫ్ట వేర్ ఉద్యోగిగా పనిచేస్తోంది. సమాచారం తెలుసుకున్న స్వాతి కుటుంబసభ్యులు చెన్నై బయలుదేరి వెళ్లారు.

స్వాతి జెన్టీయూ క్యాంపస్ సెలక్షన్ లో సెలక్ట్ అయ్యిందని స్వాతి అమ్మమ్మ, తాతయ్య రోదిస్తూ పేర్కొన్నారు. ఆమె చాలా బ్రిలియంట్ అని, చిత్రలేఖనంతో పాటు సంగీతం కూడా వచ్చని కన్నీళ్లు పెట్టుకున్నారు. గుంటూరుకు నేరుగా టికెట్ రాకపోవడంతో గౌహతి ఎక్స్ ప్రెస్ లో వయా చెన్నై మీదుగా బయలుదేరిందని తెలుస్తోంది. పెళ్లి చూపుల కోసమే స్వాతి గుంటూరు బయలుదేరినట్లు తెలుస్తోంది. ఇంతలోనే బాంబు పేలుళ్ల రూపంలో ఆమెను మృత్యువు కబళించిందని స్వాతి బంధువులు రోదించారు.

1+1+1 = 111 (అరె బై.. గిదేం లెక్క..?!)

Narendra Modi

హైద్రాబాద్ లోని ఎల్బీ స్టేడియంలో ఏర్పాటు చేసిన బహిరంగ సభలో గుజరాత్ ముఖ్యమంత్రి నరేంద్ర మోడీ మాట్లాడిండు. తెలంగాణ ప్రజల నుంచి ఓట్లు రాల్చుకోవడానికి ఆయన పడిన తాపత్రయం మొత్తం ఆయన మాటల్లనే కనపడ్డది.. తెలంగాణ రాష్ట్రం కోసం బీజేపీ ఎన్నో పోరాటాలు చేసిందని, తెలంగాణ ఏర్పడేదానికి తమ పార్టీ చిత్తశుద్ధితో కృషి జేసిందని చెప్పుకొచ్చారు. మళ్లీ వెంటనే.. కేంద్రంలోని కాంగ్రెస్ ప్రభుత్వం ఆంధ్రప్రదేశ్ అనే తల్లిని చంపేసింది, ఇది చాలా దుర్మార్గం, అన్యాయం అని మొత్తుకోవడం మొదలు పెట్టారు. అయితే.. తల్లిని చంపేందుకు అవసరమైన కత్తిని అందించింది తామేనని మాత్రం అనకుండా జాగ్రత్తపడ్డారు.. గిట్ల కిరాక్ కిరాక్ గా మాట్లడుతున్న మాటలతోనే సభకు హాజరైన జనాలు బుర్రగోక్కుంటుడగా.. మరో తిక్క'లెక్క' ఒకటి వదిలారు...
1+1+1 = 3 కాదట..! 1+1+1 = 111
 ''మూడు ఒకట్ల మూడు కాదు.. నూట పదకొండు అన్నడు..''! ఇది విన్న జనాల బుర్ర గిర్రుర్రుర్రు...న తిరిగింది. మరోసారి గిదే లెక్క చెప్పిండు.. అర్రే.. ఒకటో తరగతి సదువుతున్న పిల్లగాన్ని అడిగినా.. అమెరికా ప్రెసిడెంటు ఒబామాను అడిగినా.. చివరకు.., సచ్చిపోయి నరకంలో ఉన్నడో, స్వర్గంలో ఉన్నడో.. యాడున్నడో తెల్వదుగానీ.. ఒసామా బిన్ లాడెన్ ను అడిగినా... 1+1+1 = ఎంత..? అంటే '3' అంటరు. కానీ.. గీయనేంది..? ఒక రాష్ట్రానికి ముఖ్యమంత్రిగా ఉన్నడు, దేశానికి ప్రధాన మంత్రి అవుతానంటున్నడు.. ఇలాంటాయనకు మూడు ఒకట్లు ఎంతో తెల్వదా..? రామచంద్రా ఇదెక్కడి చోద్యం..?! అంటూ కొంతమంది ముక్కుమీద వేలేసుకోబట్టె.
మాజీ ముఖ్యమంత్రి అంజయ్య దళితుడట..!!
 మోడీజీ.. పైన పేర్కొన్న పైత్యం నుంచి తేరుకోకుండానే మరో అజ్ఞాన బాణం విసిరిండు. తెలంగాణ నేతలను ప్రస్తావించడం ద్వారా.. ఇక్కడి ప్రజలు మనసు గెలుచుకోవాలని భావించిన మోడీ.. ఆంధ్రప్రదేశ్ ముఖ్యమంత్రిగా పనిచేసిన అంజయ్యను కాంగ్రెస్ నేతలు అవమానించారని, దానికి కారణం.. ఆయన దళితుడు కావడమేనని అనేశారు. ఇది విన్న సభికులంతా.. ఒక్కసారిగా అవాక్కయ్యారు. రెడ్డి సామాజిక వర్గానికి చెందిన అంజయ్య.. దళితుడిగా ఎప్పుడు మారాడబ్బా..? అని ఆలోచనలో మునిగిపోయిండ్రు. తెలియనప్పుడు.. తెలియనట్లుండాలిగానీ.. గివేం.. తెలివితక్కువ మాటలు..? అంటూ కొందరు చెవులు కొర్కున్నరు.
ఇదేం మొదటిసారి కాదు...
 తనకు తెలియని విషయాల గురించి మాట్లాడుతూ.. పప్పులో, ఉప్పులో కాలేయడం మోడీ ఇదేం మొదటిసారి కానే కాదు. గతంలోనూ చాలా సార్లు ఇలా తెలియని విషయల్లో తనకేదో తెలివితేటలున్నట్లు మాట్లాడి అభాసుపాలయ్యారు. పాట్నా ర్యాలీలో ప్రసంగించినప్పుడు బీహారీలకు మస్కా కొట్టాలనే ఆరాటంలో.. ''విశ్వవిజేత అలెగ్జాండర్ ను ఓడించిన ఘనత బీహారీలదే..'' అనేశాడు. అయితే.. ఈ విషయం తెలియని వారు. ఆహా.. ఓహో.. అని చప్పట్లు కొట్టగా.. విద్యావంతులు మాత్రం.. ''నీ తెలివి తగలెయ్య..'' అని నెత్తిబాదుకున్నరు. ఎందుకంటే.. అలెగ్జాండర్ గంగానది దాటి బీహార్ లోకి అడుగు పెట్టనే లేదు. ఈ విషయం తెలియకుండా చప్పట్ల కోసం ఆరాటపడి, నవ్వుల పాలయ్యాడు మోడీ. అదేవిధంగా.. తక్షశిల గొప్పతనాన్ని పొగుడుతూ.. అది బీహార్ లో ఉండడం ఎంతో గొప్ప విషయమని చెప్పుకొచ్చాడు. కానీ.. వాస్తవం ఏంటంటే.. తక్షశిల ప్రస్తుత పాకిస్థాన్ లో ఉంది. ఈ విధంగా తెలియని విషయాల్లోనూ తనకు ఎంతో ప్రజ్ఞ ఉందని చాటుకోవడం కోసం ప్రయత్నించడం.. తప్పులు మాట్లాడడం.. దెబ్బైపోవడం మోడీకి ఒక అలవాటుగా మారింది.
పోల్ సర్వేలన్నీ ఒట్టివే...
 పైన చెప్పుకున్న అన్ని విషయాల్లోనూ తప్పులు మాట్లాడిన మోడీ.. హైదరాబాద్ సభలో ఒక్క నిజం చెప్పారు. అదే.. ఎగ్జిట్ పోల్స్ గురించి. రాజకీయ విశ్లేషకులు ఏసీ గదుల్లో కూర్చొని లెక్కలు వేస్తుంటారని, అవన్నీ చిత్తుకాగితాలతో సమానం అని అన్నారు. ఇప్పటి వరకూ వచ్చిన పోల్ సర్వేలన్నీ నిజాలు కావని, వాటి ఊహకు అందని విధంగా ఫలితాలు వస్తాయని చెప్పారు. అంటే.. బీజేపీకి అధిక సంఖ్యలో సీట్లు వస్తాయని ఊదరగొట్టిన సర్వేలన్నీ వట్టి మాటలేనని మోడీ తేల్చేశారు. కాబట్టి.. మోడీ గాలి వీస్తోందని, బీజేపీ హవా సాగుతోందని చెప్తున్నవన్నీ సొలు కబుర్లేనన్న విషయం నిజమేనని మోడీ ఒప్పేసుకున్నారన్నమాట..!

'తిక్క' ముదిరింది..!

Pawan Kalyan praises Modi 

''దేశ సమగ్రతను దెబ్బ తీసేలా కుల, మత, ప్రాంతీయపరంగా కొందరు మాట్లాడుతున్నారు. వారిని నరేంద్ర మోడీ క్షమించరు.'' - పవన్ కళ్యాణ్, జనసేన పార్టీ అధ్యక్షుడు
ఈ మాటలు చాలవా.. పవన్ కళ్యాణ్ కు తిక్క ఏ స్థాయిలో ఉందో తెలుసుకోవడానికి..?!
మతాన్ని రెచ్చగొట్టేదెవరో తెలీదా..?
ఈ దేశంలో మతమే ఎజెండాగా ముందుకు సాగుతున్న పార్టీ బీజేపీ అన్న విషయం రాజకీయాలపై ఏ కొద్దిపాటి అవగాహన ఉన్న వారికైనా తెలిసిన విషయం. మరి.. పవన్ కళ్యాణ్ కు ఈ విషయం తెలియదా..? ఆ మాత్రం అవగాహన లేకుండానే పార్టీ పెట్టేశాడా.?? లేక.. అంతా తెలిసి కూడా, మతోన్మాద పార్టీకి మేలు చేయాలనే ఉద్దేశంతో.. ప్రజలను మోసం చేయడానికి ప్రయత్నిస్తున్నాడా..??? బాబ్రీ మసీదు విధ్వంసం.. గుజరాత్ లో ముస్లింల ఊచకోత.. ముజఫర్ నగర్ హింస.. హైదరాబాద్ పాతబస్తీ అల్లర్లు.. ఇవన్నీ పవన్ మరిచిపోయినట్లున్నాడు. ఇవన్నీ గత అనుకుంటే.. మొన్నటికి మొన్న మోడీకి అత్యంత సన్నిహితుడు అమిత్ షా ఉత్తరప్రదేశ్ లో ఎన్నికల ప్రచారంలో మాట్లాడుతూ.. ''ముస్లింలపై ప్రతీకారం తీర్చుకోవాలి'' అని రెచ్చగొట్టేలా మాట్లాడడం.. వాటిని పవన్ దృష్టిలో బలమైన నేత అయిన నరేంద్ర మోడీ బలపర్చడం జరిగిపోయాయి. అంటే.. ముస్లింలపై దాడులకు సైతం వెనుకాడబోమని నరేంద్ర మోడీ చెప్పకనే చెప్పారు. మరి.. ఈ సంగతి పవన్ కళ్యాణ్ కు తెలియదా..?
'ప్రాంతీయ' పాపంలో బీజేపీకి భాగం లేదా..?
 పార్టీ ఆవిర్భాయ ప్రసంగంలో రాష్ట్ర విభజన పాపాన్ని ఒక్క కాంగ్రెస్ పై నెట్టేసిన పవన్ కళ్యాణ్.. అందుకు సహకరించిన బీజేపీని ఒక్క మాట కూడా అనలేదు. కానీ.. హైదరాబాద్ లో జరిగిన టిడిపి-బిజెపి ఎన్నికల ప్రచార సభలో మాట్లాడుతూ... తెలంగాణ ఏర్పాటుకు బీజేపీ సహకరించిందని చెప్పుకొచ్చారు. అంటే.. 'ఏ ఎండకు ఆ గొడుగు' అన్న చందంగా.. ఎక్కడ ఎలాంటి మాటలు అవసరమైతే.. పవన్ కళ్యాణ్ ఆ విధంగా మాట్లాడుతారనడానికి ఇంతకన్నా నిదర్శనం కావాలా..?!
మోడీ మూడు.. సర్కార్ నాలుగు.. అయినా...
 ''గుజరాత్ ముఖ్యమంత్రిగా మూడు సార్లు ఎన్నికై రాష్ట్రాన్ని అభివృద్ధి చేశారు.. బలమైన ఈ దేశాన్ని పాలించాలంటే.. మోడీ లాంటి బలమైన నేత కావాలి..'' అంటున్నాడు పవన్ కళ్యాణ్. మోడీ భ'జనసేన' అధ్యక్షుడిగా కీర్తి గడించిన ఈయనకు.. మోడీ తప్ప మరెవరూ కనిపిస్తున్నట్టు లేదు. త్రిపుర ముఖ్యమంత్రిగా ఉన్న మాణిక్ సర్కార్ వరుసగా నాలుగు సార్లు ఎన్నికయ్యారు. ఎన్నికలో మోడీ కన్నా ఒక మెట్టు ఎక్కువే ఉన్న సర్కార్.. అవినీతికి ఆమడదూరంలో ఉంటారు. దేశంలోనే అత్యంత పేద ముఖ్యమంత్రి. కేవలం నెలకు 5 వేల వేతనంతో బతుకు బండి లాగిస్తున్న నిజమైన ప్రజానాయకుడు. తనదైన లీడర్ షిప్ తో త్రిపురను అభివృద్ధి పథంలో తీసుకెళ్తున్నారు. ఇన్ని క్వాలిటీలు కలిగిన మాణిక్ సర్కార్ కు పవన్ కళ్యాణ్ కళ్లకు ఎందుకు కనిపించట్లేదో..? దీనికి ఆయనే సమాధానం చెప్తే బాగుంటుంది.
దేశ సమగ్రతకు బీజేపీ ఎలా పాటుపడుతుంది..??
ఇటీవల ఆంధ్రప్రదేశ్ రాష్ట్రాన్ని విభజించడంలో బీజేపీకి పాత్ర ఉండడమే కాదు.. గతంలో మూడు రాష్ట్రాల ఏర్పాటు బీజేపీ ఆధ్వర్యంలోని ఎన్డీయే హయాంలోనే జరిగాయి. ఇంకా.. అనేక రాష్ట్రాలను విడదీయాలనే ప్రణాళికను బీజేపీ రూపొందించింది. ''చిన్న రాష్ట్రాలు - బలమైన కేంద్రం'' అన్న నినాదంతో దేశాన్ని అరవై రాష్ట్రాలుగా విభజించాలని ఆ పార్టీ కంకణం కట్టుంది. అలాంటి పార్టీ చేతిలో దేశాన్ని పెడితే దేశ సమగ్రత మూడు పూలు ఆరు కాయలు అన్న చందంగా వెలుగుతుందని తాను నమ్మడమే కాకుండా.. జనులంతా నమ్మండని చెప్తున్న ఈ పవన్ కళ్యాణ్ ను ఏమనాలి..? పై పరిణామాలన్నీ గమనిస్తుంటే.. పవన్ కళ్యాణ్ లెక్కుందని చెప్పుకుంటున్న తిక్కకు లెక్కే లేదని, ఆ తిక్క దారుణంగా ముదిరిపోయిందని అర్థమవుతోందంటున్నారు విశ్లేషకులు..

కటకటాల కేవీపీ..?

KVP Ramachandra

మాజీ ముఖ్యమంత్రి వైఎస్ రాజశేఖర్ రెడ్డి 'ఆత్మ' బంధువు కేవీపీ అరెస్టుకు అమెరికాలో రంగం సిద్ధమైనట్లు సమాచారం. కేవీపీ అరెస్ట్ విషయమై అమెరికా, భారత్ తో సంప్రదింపులు జరుపుతున్నట్లు పీటీఐ వార్తా కథనం ప్రచురించింది. మనీలాండరింగ్ , టైటానియం కుంభకోణంలో కేవీపీ ఆరోపణలు ఎదుర్కొంటున్న సంగతి తెలిసిందే.
ఏమిటీ టైటానియం..?
 టైటానియం అనేది ఒక లోహం.. ఇనుప గనుల్లోంచి ఇనుము తీసినట్లు.. సముద్ర తీర ప్రాంతం నుండి టైటానియం అనే లోహాన్ని తీస్తారు. దీనిని విమానాలు, జలాంతర్గాములు, క్షిపణుల తయారీలో ఎక్కువగా వినియోగిస్తారు. అంతేకాదు.. కృత్రిమ అవయవాలు, మొబైల్ ఫోన్లు, క్రీడా వస్తువులు, ఆభరణాల తయారీలోనూ టైటానియం ఎక్కువగా ఉపయోగిస్తారు.
రూ.111 కోట్ల ముడుపులు..
అమెరికా 'టైటానియం'ను వ్యూహాత్మక లోహంగా పరిగణించి దీన్ని స్టోర్ చేసుకోవడం ప్రారంభించింది. దీంతో ఈ లోహం విలువ విపరీతంగా పెరిగిపోయింది. ఈ క్రమంలో.. మన రాష్ట్రంలోని సముద్ర తీర ప్రాంతాల నుండి టైటానియం వెలికితీసేందుకు.. వాటిని విదేశీ కంపెనీలకు కట్టబెట్టేందుకు వైఎస్ రాజశేఖర్ రెడ్డి హయాంలో 2006 ఏప్రిల్ 18న 'బెత్లీ' అనే సంస్థతో ఒప్పందం కుదిరింది. ఈ ఒప్పందంలో భాగంగా విదేశీ కంపెనీల నుండి మన రాష్ట్ర 'పెద్దల' కు రూ.111 కోట్ల ముడుపులు అందాయని... డిఎఫ్ (దిమిత్రి ఫిర్టాష్) గ్రూపు అనుబంధ సంస్థలు ఈ ముడుపులు వీరికి అందజేశాయని.. ఎఫ్ బిఐ తేల్చింది.
ప్రధాన నిందితులు ఆరుగురు...
 ఈ ముడుపుల భాగోతంలో ప్రధానంగా ఆరుగురు నిందితుల పేర్లను ఎఫ్ బి ఐ బయటపెట్టింది. ఇందులో.. మన రాష్ట్రానికి చెందిన, వైఎస్ ఆత్మ బంధువైన కేవీపీ ఉన్నారు. ఈయనతో పాటు డిఎఫ్ గ్రూపు కంపెనీల అధినేత దిమిత్రి ఫిర్టాష్, హంగేరీకి చెందిన వ్యాపార వేత్త ఆండ్రాస్ నోప్, అమెరికాలో స్థిరపడిన భారతీయుడు గజేంద్రలాల్, శ్రీలంకకు చెందిన పెరియస్వామి, ముడుపుల సమన్వయ కర్తగా వ్యవహరించిన సురెన్ జెవోర్జియాన్ పేర్లను ప్రధానంగా పేర్కొంది. వీరితో పాటు.. ఎపిఎండిసి ఎండి రాజగోపాల్ , మిస్టర్ 'సి' ఈ కుంభకోణంలో పాలు పంచుకున్నట్లు తెలిపింది. ఇంతకీ ఈ మిస్టర్ 'సి' ఎవరనేది ఇంకా స్పష్టం కాలేదు.
కేవీపీ విషయంలో స్పందించని ప్రభుత్వం..
ఈ కేసులో నిందితుడిగా ఉన్న ఉక్రెయిన్ వ్యాపారవేత్తను ఆ దేశ ప్రభుత్వం మార్చి 12, 2014న అరెస్ట్ చేసింది. అనంతరం ఆయన రూ.1000 కోట్ల పూచీకత్తుపై విడుదల కావాల్సి వచ్చింది. కానీ మనదేశ ప్రభుత్వం, దర్యాప్తు సంస్థలు ఈ విషయంలో సరిగ్గా స్పందించలేదు. టైటానియం కుంభకోణానికి సంబంధించిన నిందితులలో రాజ్యసభ ఎంపి కేవీపీ ఉన్నప్పటికీ ఈ ఘటనపై విచారణ జరిపే ప్రయత్నం కూడా చేయలేదు. ఈ నేపథ్యంలో అమెరికా ప్రభుత్వం విచారణ పూర్తిచేసి.. కేవీపీ అరెస్టుకు రంగం సిద్ధం చేసుకున్నట్లు తెలుస్తోంది.